Castro de Zoñán

Neste castro de Zoñán, Os Remedios, Mondoñedo (Lugo) apareceron moitas cousas, entre elas un puñal, cachos de barro, muíños, moedas e unha ola de barro tan grande que collía unha persoa dentro dela.
Aló polo 1920 os nenos da escola de Zoñán foron celebrar os Maios a Mondoñedo e levaron dentro da ola de barro unha nena duns doce anos. Despois quedouse con ela un de Mondoñedo e xa non se soubo máis da ola.
No sochán da croa do castro de Zoñán viven os mouros. Son ricos coma cochos, gardan fortunas inmensas nos seus pazos aterrados e teñen cabalos que levan a beber de noite por un túnel que vai desde a croa ata o rego que pasa cabo da igrexa de San Cristovo. Hai que víu fumegar as chemineas das súas casas soterradas por entre os felgos e as queirogas da tona da terra.
E hai, soterrado, un xogo de bolos, con lastra e todo, feito de ouro. Cando trona dise que están xogando ós bolos os mouros do castro de Zoñán.

BIBLIOGRAFÍA

Fonte:
Información de XUSTO CARREIRAS LEDO, Zoñán, Os Remedios,Mondoñedo (Lugo). 20 de marzo de 1995.

Biliografía:
CUBA, X. R., REIGOSA, A., «Xeografía mítica da provincia de lugo (I): Cen lugares con lenda», en Croa, nº 8, 1998, pp. 42-63.
REIGOSA CARREIRAS, A. «Mouros e outros enredos no castro de Zoñán», en La Voz de Galicia, (A Mariña), 20 de agosto de 2002.

CATEGORÍAS RELACIONADAS

Seres míticos
Xeografía mítica

Enviar comentario a este artigo:
Texto:
Autor:
Copia no cadro de abaixo os seguintes números:
Este é un sistema de filtro anti-spam instalado para evitar que o buzón de contacto se encha de mensaxes de publicidade non desexada enviados automaticamente por programas de spam. Serve para comprobar que o que escribe é unha persoa e non un programa.